Jer 29 | NdeIBE | STEP | La ngamazwi encwadi umphrofethi uJeremiya ayithumela eseJerusalema ebadaleni abasindayo phakathi kwabathunjwayo lakubaphristi, abaphrofethi, lakubo bonke abantu uNebhukhadinezari abathatha eJerusalema wabasa ekuthunjweni eBhabhiloni. (

Jeremiah 29

Incwadi Kwabasekuthunjweni

1 La ngamazwi encwadi umphrofethi uJeremiya ayithumela eseJerusalema ebadaleni abasindayo phakathi kwabathunjwayo lakubaphristi, abaphrofethi, lakubo bonke abantu uNebhukhadinezari abathatha eJerusalema wabasa ekuthunjweni eBhabhiloni. ( 2 Lokhu kwakungemva kokuba inkosi uJehoyakhini lonina indlovukazi, izikhulu zasemthethwandaba kanye labadala bakoJuda labaseJerusalema, izingcitshi lezingcwethi basebeye ekuthunjweni besuka eJerusalema.)

3 Incwadi leyo wayiphathisa u-Elasa indodana kaShafani loGemariya indodana kaHilikhiya, abathunywa nguZedekhiya inkosi yakoJuda kuNebhukhadinezari eBhabhiloni. Yathi:

4 UJehova uSomandla, uNkulunkulu ka-Israyeli uthi kubo bonke labo engabasa ekuthunjweni eBhabhiloni besuka eJerusalema: 5 “Yakhani izindlu lihlale phansi; limani izivande lidle izithelo zazo.

6 Thathani abafazi lizale amadodana lamadodakazi; dingelani amadodana enu abafazi lendise lamadodakazi enu, ukuze lawo abe lamadodana kanye lamadodakazi; inani lenu lande ngapho; lingehli. 7 Funani ukuthula lokuphumelela kwedolobho engilise ekuthunjweni kulo. Likhulekeleni kuJehova, ngoba uma liphumelela lani lizaphumelela.” 8 Ye, uJehova uSomandla, uNkulunkulu ka-Israyeli uthi, “Lingavumeli ukuthi abaphrofethi labahlahluli abaphakathi kwenu balikhohlise. Lingawalaleli amaphupho elibakhuthaza ukuthi bawaphuphe. 9 Baphrofetha amanga kini ngebizo lami. Kangibathumanga,” kutsho uJehova.

10 UJehova uthi: “Lapho iminyaka engamatshumi ayisikhombisa isiphelile eBhabhiloni, ngizakuza kini ngigcwalise isithembiso sami somusa sokulibuyisela kule indawo. 11 Ngoba ngiyawazi amacebo engilawo ngani,” kutsho uJehova, “amacebo okuliphumelelisa hatshi ukulilimaza, amacebo okulinika ithemba kanye lesikhathi esizayo. 12 Ngaleso sikhathi lizangibiza lizekhuleka kimi, njalo ngizalizwa. 13 Lizangidinga lingifumane uma lingidinga ngenhliziyo yenu yonke.

14 Lizangifumana,” kutsho uJehova, “njalo ngizalibuyisa livela ekuthunjweni. Ngizaliqoqa ezizweni zonke lasezindaweni zonke engalixotshela kuzo,” kutsho uJehova, “njalo ngilibuyise endaweni engalithatha kuyo ngilisa ekuthunjweni.”

15 Lingatsho lithi, “UJehova usesiphe abaphrofethi eBhabhiloni,” 16 kodwa uJehova uthi mayelana lenkosi ehlala esihlalweni sobukhosi sikaDavida labantu bonke abasala kulelidolobho, abantu bakini abangahambanga lani ekuthunjweni – 17 yebo, uJehova uthi, “Ngizabathumela inkemba, lendlala lesifo njalo ngizabenza babe njengomkhiwa obolileyo ongeke udliwe. 18 Ngizaxotshana labo ngenkemba, ngendlala langesifo njalo ngizabenza benyanyeke kuyo yonke imibuso yasemhlabeni njalo babe yinto yokuqalekiswa lokwesatshwa, ukuklolodelwa lokuthukwa, phakathi kwezizwe zonke engibaxotshela kuzo. 19 Ngoba kabawalalelanga amazwi ami,” kutsho uJehova, “amazwi engawathumela kubo njalonjalo ngezinceku zami abaphrofethi. Lani abasekuthunjweni kalilalelanga,” kutsho uJehova.

20 Ngakho, zwanini ilizwi likaJehova, lonke lina elisekuthunjweni engalisusa eJerusalema ngalisa eBhabhiloni.

21 Mayelana lo-Ahabi indodana kaKholaya loZedekhiya indodana kaMahaseya, abaphrofetha amanga kini ngebizo lami, uJehova uthi, “Ngizabanikela kuNebhukhadinezari inkosi yase-Bhabhiloni ozababulala phambi kobuso benu. 22 Ngenxa yabo, bonke abathunjiweyo abavela koJuda abaseBhabhiloni bazasebenzisa isiqalekiso lesi sokuthi: ‘UJehova makenze kini njengalokhu akwenze kuZedekhiya lo-Ahabi, abatshiswa yinkosi yaseBhabhiloni ngomlilo,’ 23 ngoba benze izinto ezimbi kakhulu ko-Israyeli; bafeba labafazi babomakhelwane babo, baqamba amanga ngebizo lami, engingazange ngithi bakwenze. Ngiyakwazi njalo ngingufakazi kukho,” kutsho uJehova.

Ilizwi KuShemayiya

24 Tshela uShemayiya umNehelami uthi,

25 “UJehova uSomandla, uNkulunkulu ka-Israyeli uthi: ‘Wathumela izincwadi ngebizo lakho kubo bonke abantu baseJerusalema, lakuZefaniya indodana kaMahaseya umphristi, lakwabanye abaphristi bonke. KuZefaniya wathi, 26 ‘UJehova usekubeke ukuba ngumphristi esikhundleni sikaJehoyada ukuba ube ngumphathi wendlu kaJehova; umuntu ohlanyayo ozenza umphrofethi ubomfaka esitokisini umfake lezankosi zentanyeni. 27 Pho kungani ungamkhuzanga uJeremiya wase-Anathothi, ozenza umphrofethi phakathi kwenu?

28 Uthumele ilizwi leli kithi eBhabhiloni elithi: Kuzakuba yisikhathi eside. Ngakho yakhani izindlu lihlale phansi; limani izivande lidle izithelo zazo.’ ”

29 Kodwa, uZefaniya umphristi incwadi le wayibalela uJeremiya umphrofethi. 30 Ilizwi likaJehova laselifika kuJeremiya lisithi, 31 “Thumela ilizwi leli kubo bonke abathunjiweyo uthi, ‘Mayelana loShemayiya umNehelami uJehova uthi: Njengoba uShemayiya esephrofetha kini, lanxa mina ngingamthumanga, walenza lakholwa amanga, 32 uJehova uthi: Ngeqiniso ngizamjezisa uShemayiya umNehelami kanye lenzalo yakhe. Kakuyikuba lowakibo ozasala ekhona phakathi kwalababantu, njalo lezinto ezinhle engizazenzela abantu bami kasoze azibone, kutsho uJehova, ngoba uphrofetha ukungihlamukela.’